Allt loft inniheldur raka eða vatnsgufu, en þó í mismiklum mæli. Það vatnsgufuinnihald sem loftið getur borið hverju sinni er háð hitastigi loftsins. Þannig getur hlýtt loft borið meiri raka en kalt eins og sést á mynd 4. Mettunarraki er það magn vatnsgufu sem loftið getur innihaldið í þann mund sem rakaþétting á sér stað, þ.e. þegar ósýnileg vatnsgufan breytist í fjölda örsmárra vatnsdropa. Þá er sagt að loftið sé rakamettað.
Mynd 4
Línan sýnir mettunarraka í einingunni grömm af vatnsgufu í hverjum rúmmetra lofts (gr/m3). Þá má lesa beint að mettunarraki lofts við +30°C er 30,4 gr/m3 og við 0°C verður mettun þegar rakainnihaldið er 4,9 gr/m3. Loftið inniheldur vatnsgufu þó svo að hitastigið sé undir frostmarki, en gildi mettunarraka er þá lágt. Loft í punkti A sem er +20°C og með rakainnihald 10 gr/m3 nær mettun á tvennan hátt. Annars vegar ef rakainnihaldið eykst þar til það nær tæplega 17 gr/m3 eða sem er algengast að loftið kólnar niður að daggarmarki sínu, sem í þessu tilviki er 10°C þar sem mettunarrakalínan er fyrir þetta tiltekið rakainnihald loftsins.
Daggarmarkloftsins kallast það hitastig sem loftið þarf að kólna svo mettun verði.
Rakastig gefur til kynna sambandið á milli vatnsinnihalds og mettunarraka loftsins. Tökum dæmi. Hiti lofts mælist 0°C, rakainnihald þess reynist vera 3,3 gr/m3 og mettunarrakinn 4,9 gr/m3.
Þá er rakastigið einfaldlega hlutfall raunverulegs rakainnihalds og mettunarraka við hitastig loftsins, eða
3,3 / 4,9 * 100% = 67%
Rakastigið gefur til kynna hversu langt viðkomandi loft er frá rakamettun. Loftið er rakamettað þegar rakastigið er 100%.
Hafa verður í huga að breytingar á hitastigi koma beint fram í rakastiginu. Rakastig lækkar í lofti yfir vegi sem hlýnar vegna inngeislunar sólar. Að sama skapi hækkar rakastigið eftir að sól er sest og yfirborð kólnar vegna útgeislunar. Þetta á sér stað þó svo að sjálft rakainnihald loftsins haldist hið sama.
Rakastigið er afar gott hjálpartæki þegar leggja skal mat á það hvort þoka sé t.d. á fjallvegum. Rakastigið í þoku, sem dregur verulega úr skyggni, er ævinlega 100%. Þegar rakastigið er 98-99% getur það verið vísbending um ekki jafn þykka þoku, þ.e. þokumóðu eða þokubletti með betra skyggni á milli. Eins getur hátt rakastig verið til vitnis um afar lágan skýjabakka sem ekki endilega dregur úr skyggni. |
Þoka: Skyggni < 1.000 m
Þokumóða: Skyggni frá 1 km upp í 10 km.
3.1 Skilyrði raka í lofti í vegi við mismunandi hitastig.
Mynd 5
LOFTHITI | 10°C | 5°C | 0°C | -5°C |
METTUNARRAKI | 9 gr/m3 | 7 gr/m3 | 5 gr/m3 | 4 gr/m3 |
RAKAINNIHALD | 7 gr/m3 | 7 gr/m3 | 5 gr/m3 | 4 gr/m3 |
RAKASTIG | 78 % | 100 % | 100 % | 100 % |
DAGGARMARK | 5°C | 5°C | 0°C | -5°C |
RAKATAP ÚR LOFTI | | | 2 gr/m3 | 1 gr/m3 |
| | | Dögg | Hrím |
Í dæminu hér að ofan er loftið 10°C í upphafi og rakainnihaldið 7 gr/m3. Rakamagnið má hlutfallslega gefa til kynna með myndinni, þar sem við ímyndum okkur að loftraki í einum rúmmetra lofts sé allur næst veginum. Í okkar dæmi getur loftið innihaldið að hámarki 9 gr/m3. Nú kólnar og við 5C verður mettun og rakastigið 100%. Enn kólnar loftið og nú niður í 0°C. °Við það hitastig getur loftið mest innihaldið 5 gr/m3. Það þýðir að loftið losar sig við mismuninn. Dögg fellur á veginn. Enn kólnar og nú niður -°5°C. Mettunarrakinn við það hitastig er aðeins 4 gr/m3. Af því að hitinn er lægri en frostmark fellur héla á veginn.
Við sjáum nokkrar raunverulegar birtingarmyndir þessa ferils:
- Við kólnun fellur dögg á veg. Litlu síðar frystir og döggin myndar hálku.
- Lofthitinn er ofan frostmarks, en veghitinn undir 0°C. Dögg fellur á veginn sem frýs undir eins og myndar hálku.
- Loft og veghiti eru hvorutveggja undir 0°C. Mettun loftsins á sér stað, ískristallar myndast og vegurinn hélar.
Við náttúrulegar aðstæður frýs vatn á vegi þegar hitinn fer niður fyrir 0°C. Með notkun á salti er hægt að breyta frostmarki vatnsins. Mynd 6 sýnir hvernig frostmarkið lækkar eftir því sem saltinnihald vatnsins eykst. Á mynd 7 má hins vegar sjá hvernig áborið salt í föstu formi hefur áhrif á frostmark vatnsins eftir því hversu vatnsaginn er mikill á vegi.
Mynd 6
TENGSL FROSTMARKS VATNS OG SALTINNIHALDS.
Mynd 7
VIÐ ÁKVÖRÐUN Á SALTMAGNI ÞEGAR FYRIRBYGGJA Á HÁLKU ÞARF AÐ TAKA TILLIT TIL BÆÐI VATNSAGANS Á VEGINUM OG HVERSU MIKIÐ MEGI ÆTLA AÐ FROSTIÐ VERÐI.
1mm vatnslinsa á vegi jafngildir 1 lítra á fermeter. 1mm = 1l/m2
0,1 mm vatnslinsa: 0,1 mm = 0,1l/m2. Sömu aðferð er hægt að hafa til hliðsjónar skömmu eftir úrkomu þegar úrkomumagnið er þekkt. Þá verður að hafa í huga að hluti úrkomunnar rennur af veginum, eins uppgufun og umferð sem beinir bleytu af veginum. |
3.2 Fjögur dæmi
Mynd 8
Í tilfelli A verður engin döggvun, þar sem veghitinn er hærri en daggarmark loftsins.
Í tilfelli B er veghitinn lægri en daggarmark loftsins. Döggvun verður og vegurinn blotnar. Engin ísmyndun svo fremi að veghitinn haldist ofan frostmarks.
Í tilfelli C myndast ís á yfirborði, líkast til minniháttar þar sem veghitinn er litlu lægri en daggarmark loftsins.
Í tilfelli D fellur mikill raki úr loftinu og myndar ís þar sem veghitinn er undir frostmarki og mikill munur daggarmarks og veghita. Auk þess gefur daggarmarkið til kynna mikið rakainnihald í lofti og því getur meiri raki en ella hélað á yfirborði vegarins.
Sé veghitinn lægri en daggarmark loftsins og jafnframt undir frostmarki er hætt við ísmyndun og hálku. |
3.3 Um ískristalla
Þegar vatn frýs festast vatnssameindirnar saman og mynda ískristalla. Ís á vegi sem þannig myndast er að mestu gerður úr sexstrendum flötum plötum sem loða saman og mynda samfellda íshimnu.
Stór mynd ->
Mynd 9
VATN FRÝS Á VEGI. ÍSKRISTALLAR HAFA ÓLÍKA LÖGUN. LJÓSMYND AF SEXSTRENDRI PLÖTU TIL HÆGRI.
Héla sem fellur á veginn í frosti hefur aðra kristallagerð. Það eru að mestu leyti langar ísnálar sem vaxa saman og mynda reglulegt og greinótt munstur. Yfirborð ískristallanna er mun stærra við hélu- eða hrímmyndun og viðnámið því meira en þegar ísinn samanstendur af sexstrendum plötum. Frjósi vatn á vegi í vægu frosti myndast einkum sexstrendar plötur, en í meira en 3 til 4 stiga frosti eykst hlutfall hvers kyns ísnála í kristallabyggingunni og við það eykst viðnámið í ísnum nokkuð.
Stór mynd ->
Mynd 10
VEGURINN HÉLAR. LANGAR ÍSNÁLAR VAXA Í STJÖRNUMUNSTUR ÞEGAR LOFT ER METTAÐ RAKA. STJÖRNURNAR HAFA MIKLA SAMLOÐUNAREIGINLEIKA EINS OG SÉST Á LJÓSMYNDINNI TIL HÆGRI.
Sjá einnig fróðleik um viðnámsstuðla